ఊహా చిత్రంలో పోలికలు ఉన్న మహిళ గురించి ఆచూకీ తెలిస్తే వెంటనే తమకు సమాచారం అందించాలని పోలీసులు కోరుతున్నారు. అందుకు సంబంధించి హత్యకు గురైన అమ్మాయి ఫోటోలతో పాటు ఊహా చిత్రం ఫోటోలతో పోలీసులు ఒక పత్రికా ప్రకటనను విడుదల చేశారు. ఆ కేసుకు సంబంధించి వివరాలు ఇలా ఉన్నాయి. అల్లూరి సీతారామరాజు జిల్లా అడ్డతీగల మండలం తిమ్మాపురం గ్రామ సమీపంలో గల ఏలేరు కాలువ వద్ద గత ఆగస్టు 17 వ తేదీన తల, చేతులు మరియు కాళ్లు వేరు చేయబడి ఉన్న ఒక మహిళా మృతదేహాన్ని గుర్తించడం జరిగింది. చనిపోయిన మహిళ వయసు సుమారు 25 నుంచి 30 సంవత్సరాలు మధ్య ఉంటుంది. మృతదేహంపై పసుపు రంగు లంగా ధరించబడి ఉంది ఇందు నిమిత్తం అడ్డతీగల పోలీస్ స్టేషన్ లో కేసు నమోదు చేసి దర్యాప్తు చేయడం జరుగుతోంది. దర్యాప్తులో భాగంగా అల్లూరి సీతారామరాజు జిల్లా ఎస్పీ అమిత్ బర్జర్ ఆదేశాల మేరకు రంపచోడవరం ఏఎస్పీ జగదీష్ చనిపోయిన మహిళ యొక్క ఊహా చిత్రాన్ని వేయించడం జరిగింది. ఈ ఊహా చిత్రంలో పోలికలు ఉన్న మహిళ గురించి ఆచూకీ తెలిసిన వెంటనే సంబంధిత పోలీస్ స్టేషన్లలో తెలియజేయాలని కోరారు. అలాగే అడ్డతీగల సీఐ సెల్ నెంబర్ 9440900768, 9959066999, అడ్డతీగల ఎస్సై సెల్ నెంబర్ 9440900769, 9492404067 లకు ఊహా చిత్రంలో పోలికలు ఉన్న మహిళ ఎక్కడైనా కనిపిస్తే సమాచారాన్ని అందజేయాలని ఆ ప్రకటనలో కోరారు. అలాగే ఈ విషయాన్ని సోషల్ మీడియా గ్రూపులలో ప్రచారం చేయాలని వారు కోరారు.
