గుజరాత్‌లోని అహ్మదాబాద్‌లో ఘోర విమాన ప్రమాదం జరిగింది. లండన్ బయలుదేరిన ఎయిర్ ఇండియా విమానం టేకాఫ్ అయిన కొద్ది సేపటికే కుప్పకూలింది. ఈ విమాన ప్రమాదంలో గుజరాత్ మాజీ ముఖ్యమంత్రి విజయ్ రూపానీ కూడా ప్రాణాలు కోల్పోయారు. ఆయన లండన్‌లో ఉంటున్న తన కుమార్తెను చూసేందుకు ఆ విమానంలో బయలుదేరినట్లు తెలిసింది. బీజేపీకి చెందిన విజయ్ రామ్నిక్‌లాల్‌భాయ్ రూపానీ 2016 నుంచి 2021 వరకు రెండు సార్లు గుజరాత్ ముఖ్యమంత్రిగా పనిచేశారు. ఆయనకు ఇద్దరు కుమారులు, ఒక కుమార్తె. చిన్న కుమారుడు పూజిత్ ఓ ప్రమాదంలో ప్రాణాలు కోల్పోయాడు.
1956 ఆగస్టు 2న జన్మించిన విజయ్ రామ్నిక్‌లాల్ రూపానీ 2016 నుండి 2021 వరకు గుజరాత్ రాష్ట్ర 16వ ముఖ్యమంత్రిగా రెండు పర్యాయాలు పనిచేశారు. ఆయన రాజ్‌కోట్ వెస్ట్ నియోజకవర్గం నుండి గుజరాత్ శాసనసభ సభ్యుడిగా ఎన్నికయ్యారు.
ప్రారంభ జీవితం, విద్య:
విజయ్ రూపానీ మయన్మార్‌లోని యాంగోన్‌లో జైన బనియా కుటుంబంలో రామ్నిక్‌లాల్ రూపానీ, మాయాబెన్ దంపతులకు ఏడో, కనిష్ఠ పుత్రుడిగా జన్మించారు. 1960లో మయన్మార్‌లో రాజకీయ అస్థిరత కారణంగా ఆయన కుటుంబం గుజరాత్‌లోని రాజ్‌కోట్‌కు వలస వెళ్లింది. ఆయన ధర్మేంద్రసిన్హ్జీ ఆర్ట్స్ కాలేజీ నుంచి బ్యాచిలర్ ఆఫ్ ఆర్ట్స్ (బీఏ, సౌరాష్ట్ర యూనివర్సిటీ నుంచి ఎల్‌ఎల్‌బీ (న్యాయ శాస్త్రం) పట్టా పొందారు. ఆయన తన తండ్రి స్థాపించిన రసిక్‌లాల్ అండ్ సన్స్ అనే ట్రేడింగ్ సంస్థలో భాగస్వామిగా ఉన్నారు. స్టాక్ బ్రోకర్‌గా కూడా పనిచేశారు.
రాజకీయ జీవితం:
విజయ్ రూపానీ తన రాజకీయ జీవితాన్ని అఖిల భారతీయ విద్యార్థి పరిషత్ (ఏబీవీపీ) ద్వారా విద్యార్థి ఉద్యమకారుడిగా ప్రారంభించారు. 1971లో విజయ్ రూపానీ రాష్ట్రీయ స్వయం సేవక్ సంఘ్(ఆర్ఎస్ఎస్)లో చేరారు. బీజేపీ స్థాపన నుంచి ఆయన ఆ పార్టీతో సన్నిహితంగా ఉన్నారు. 1975-77లో ఎమర్జెన్సీ సమయంలో ఆయన 11 నెలల పాటు భుజ్, భావ్‌నగర్ జైళ్లలో ఖైదీగా గడిపారు. 1978 నుండి 1981 వరకు ఆర్‌ఎస్‌ఎస్‌లో ప్రచారక్‌గా పనిచేశారు.
బీజేపీలో పదవులు:
*1996-97లో రాజ్‌కోట్ గుజరాత్ మేయర్‌గా ఎన్నికయ్యారు.
*2006లో గుజరాత్ టూరిజం చైర్మన్‌గా నియమితులయ్యారు.
*2006 నుండి 2012 వరకు రాజ్యసభ సభ్యుడిగా పనిచేశారు.
*గుజరాత్ బీజేపీ యూనిట్‌లో నాలుగు సార్లు జనరల్ సెక్రటరీగా పనిచేశారు.
*2014లో, వాజుభాయ్ వాలా రాజ్‌కోట్ వెస్ట్ ఎమ్మెల్యే పదవికి రాజీనామా చేయడంతో, విజయ్ రూపానీ బీజేపీ తరపున ఆ స్థానం నుండి ఉప ఎన్నికల్లో పోటీ చేసి భారీ మెజారిటీతో గెలిచారు.
*నవంబర్ 2014లో ముఖ్యమంత్రి ఆనందీబెన్ పటేల్ మొదటి కేబినెట్ విస్తరణలో రవాణా, నీటి సరఫరా, కార్మిక, ఉపాధి శాఖల మంత్రిగా చేరారు.
*ఫిబ్రవరి 2016 నుండి ఆగస్టు 2016 వరకు గుజరాత్ బీజేపీ అధ్యక్షుడిగా పనిచేశారు.
ముఖ్యమంత్రి పదవి:
*ఆనందీబెన్ పటేల్ రాజీనామా చేసిన తర్వాత, విజయ్ రూపాణీ 7 ఆగస్టు 2016న గుజరాత్ ముఖ్యమంత్రిగా ప్రమాణ స్వీకారం చేశారు.
*2017 గుజరాత్ శాసనసభ ఎన్నికల్లో రాజ్‌కోట్ వెస్ట్ నియోజకవర్గం నుండి ఇండియన్ నేషనల్ కాంగ్రెస్ అభ్యర్థి ఇంద్రనీల్ రాజ్యగురును ఓడించి గెలిచారు.
2017 డిసెంబర్ 26న రెండవసారి ముఖ్యమంత్రిగా ప్రమాణ స్వీకారం చేశారు. నితిన్ పటేల్ ఉప ముఖ్యమంత్రిగా ఉన్నారు.
*ఆయన హయాంలో గుజరాత్‌లో 6,000 గ్రామాలను డిజిటల్ హైవేతో అనుసంధానించారు. ఉజాలా యోజన కింద ఎల్‌ఈడీ బల్బుల ధరలను తగ్గించారు.
*2021 సెప్టెంబర్ 11న ఆయన ముఖ్యమంత్రి పదవికి రాజీనామా చేశారు. దీని తర్వాత భూపేంద్ర పటేల్ ముఖ్యమంత్రిగా నియమితులయ్యారు.
వ్యక్తిగత జీవితం:
విజయ్ రూపాణీ అంజలీ రూపానీని వివాహం చేసుకున్నారు, ఆమె బీజేపీ మహిళా విభాగంలో సభ్యురాలు. వారికి ఒక కుమారుడు రుషభ్, కుమార్తె రాధిక ఉన్నారు. వారి చిన్న కుమారుడు పూజిత్ ఒక ప్రమాదంలో మరణించాడు. వారు పూజిత్ రూపాణీ మెమోరియల్ ట్రస్ట్‌ను దాతృత్వ కార్యకలాపాల కోసం స్థాపించారు. విజయ్ రూపానీ రాజకీయ జీవితం సామాన్య కార్యకర్త నుంచి గుజరాత్ ముఖ్యమంత్రిగా ఎదిగిన సుదీర్ఘ ప్రయాణాన్ని సూచిస్తుంది. ఆయన స్వభావం, నైపుణ్యం రూపానీని బీజేపీలో విశ్వసనీయ నాయకుడిగా నిలబెట్టాయి.